« Fantom509 se ekspresyon reyalite enstitisyon lapolis la sitou wo kòmandman an » | Robenson Fils-aimé reponn Marie Yolène Gilles

Analiz: « Fantom509 se ekspresyon reyalite enstitisyon lapolis la sitou wo kòmandman an » selon Robenson Fils-aimé, pou reponn ak Marie Yolène Gilles.

Madi 23 mas 2021 ((rezonodwes.com))– Anpil moun respekte travay ou, Madam Marie Yolène Giles(FJKL) nan koze dwa moun nan peyi Dayiti pandan plizyè ane, men nou tout remake ou fè yon gwo flay konsènan dosye dezòd polisye ki regwoupe yo nan Fantom509 la nan entèvansyon w sou Magik9. An n gade!


 (adsbygoogle = window.adsbygoogle || []).push({});

Dabò pa gen okenn sitwayen serye, onèt, responsab k ap janm aksepte anachi oubyen dezòd sou okenn fòm nan peyi a. Donk nou youn pa ka ankouraje ajisman gwoup Fantom 509 nan ap fè dènye tan sa yo, kòm ayisyen konsekan epi konsyan.

Tout aksyon oubyen tout fè sosyal gen yon koz oubyen yon eksplikasyon posib. Pou dosye Fantom509 la, fò n gade rezon ki kreye gwoup sa paralèlman ak Lapolis la. Nou tout konnen depi lontan, enstitisyon sa a, gen anpil dezòd k ap fèt anndan l epi ki kontwole l. An fèt, dezòd la sòti nan piwo nivo nan enstitisyon lapolis la.

Nou tout okouran se prèske chak jou dwa senp ajan yo ap vyole nan enstitisyon an. Lè se pa wo kòmandman an, se gwo chabrak nan Leta a k ap itilize yo mal. Fè yo antre nan vye dyòb sal epi aprè yo pran yo kòm boukemisè. Yo trete yo pi mal ke chyen, san n pa bliye premye minis Jouthe Joseph te treye yo konsa nan yon entèvansyon medyatik.


 (adsbygoogle = window.adsbygoogle || []).push({});

Nan tout peyi kote Lajistis pa efektiv, kote l ap distribye jistis sou mezi, avèk tout diskriminasyon, ap toujou gen sa. Lè se wo kòmandman lapolis oubyen yon polisye ki pwòch ekip sou pouvwa a, ki enplike nan vye zak, Lajistis ak enspeksyon jeneral enstitisyon an, souvan fèmen je l sou li malgre prezans klamè piblik. Lè se yon lòt ki onèt, ki rete pwofesyonèl nan travay li, tout enspeksyon jeneral gentan anbranl.

Èske nou konnen gen anpil polisye ki nan prizon oubyen mawon pou yon senp koze ? Swa yo te metrize ti fanm yo gwo chèf, swa yo te bay yon pwòch yon gwo chabrak nan politik la oswa nan Lapolis la yon kontrabansyon. Èske n konnen gen polisye ki menm egzekite akoz yo pa t deside antre nan yo koze sal oubyen anba tab, kòm anpil gwo chèf nan enstitisyon an ap fè l ?

An n pran kanaj ki fèt nan Vilaj de Dye a kote anpil polisye tonbe mal pa egzanp. Èske n pa wè wo kòmandman an ak Leta a bay yon « cha blende » plis enpòtans ke kadav polisye yo ? Nou pa menm bezwen pale de fanmi yo ki pèdi ni sak ni krab depi an lagan.

Kòman w konprann yo polisye pa ka jwenn kòb sou ti kat la epi ti fanm ki pa nan Lapolis la jwenn li regilyèman ? Kòman konprann lapolis pa ka jwenn ekipman pou travay epi menm sa yo ap itilize nan biznis gwo chèf nan enstitisyon an ? Anpil nan nou t ap tande delege SPNH la.


 (adsbygoogle = window.adsbygoogle || []).push({});

Fò n konsyan dezòd k ap kangrennen enstitisyon an sòti dirèkteman nan wo kòmandman an ak enfliyans nèg pokitik yo sou li epi desann nan pi ba nivo a. Fò n pa akile senp ajan yo ki ta deside antre nan gwoup Fantom509. Fò n ka konprann, tout dezòd sa yo se jis ekspresyon yon pakèt fristasyon, yon gwoup jenn gason ak fanm ki te vle vin ede popilasyon an nan lespwa pou ede tèt yo ak fanmi yo aprè.

Nou konnen byen, depi tèt pa bon, kò pa ka bon. Se tèt ki dwe modèl nan bay bon egzanp lan. Anplis depi pa gen respè lalwa ki se dwa ak libète moun ak gen anachi kanmenm. Raple nou pwovèb ayisyen sa: »Tout bèt jennen mòde. »

Anfen, pèsonn pa ka konsyone dezòd yon gwoup moun kèlkeswa estati l nan yon sosyete ki nan etadedwa, men fò pozisyon ak entèvansyon nou yo dwe fèt ak anpil objektivite, san diskriminasyon ak prejije.

Donk madam Gilles (FJKL) pwoblèm nan se pa polisye yo ki sèl ak premye responsab nan chèn dezòd k ap fèt nan enstitisyon lapolis la. Dayè konsta nou fè epi ki tris anpil, dezòd la chita kò l anndan prèske tout enstitisyon anndan peyi a.

Robenson FILS-AIMÉ
Jounalis, Etidyan nan Dwa, Jèn angaje
Email: salmisteroben@yahoo.fr
Tel: (509)44477180; 48491402

source

Leave a Comment

Your email address will not be published. Required fields are marked *

Social Media Auto Publish Powered By : XYZScripts.com
%d bloggers like this:

Send us your Problem:

Please, Fill out all the fields.

Radio Station:

Your message has been sent. Thanks 😊